<p style="text-align: justify; "><span>फुलझाडांपैकी पॉप्लर या इंग्रजी नावाने ओळखल्या जाणाऱ्या व पॉप्यूलस या लॅटिन नावाच्या वंशात</span><span>[ सॅलिकेसी ] समाविष्ट असलेल्या काही पानझडी शोभिवंत वृक्षांना ‘अॅस्पेन’या इंग्रजी नावाने ओळखतात. यांच्या पानांचे देठ दुर्बल व बाजुंनी सपाट असल्याने ती बहुधा वाऱ्याने थरथरतात पॉ. ट्रेम्युलॉइड्स (क्वेकिंग अॅस्पेन) , पॉ. ट्रेन्युला (यूरोपीय अॅस्पेन) व पॉ. ग्रँडिडेंटॅटा (बिगटूथ्ड अॅस्पेन) यांचा त्यात समावेश होतो. यांचा प्रसार यूरोपात, आशियात व अमेरिकेत आहे. भारतात पॉप्यूलस वंशातील आठ जाती आढळतात, परंतु अॅस्पेन म्हणता येईल अशी जाती आढळत नाही.</span></p> <p style="text-align: justify; ">अमेरिकन अॅस्पेन (क्वेकिंग अॅस्पेन) हा अमेरिकेतील महत्त्वाचा व जलद वाढणारा वृक्ष असून त्याची जास्तीत जास्त उंची २८ मी. पर्यंत जाते. पाने गोलसर, एकाआड एक, लहान व दातेरी; हिवाळी कळ्या टोकदार व चकचकीत; फुले एकलिंगी, विभक्त झाडांवर व लोंबत्या कणिशांवर येतात. बोंड तडकल्यावर चार शकले होतात व केसाळ बिया बाहेर पडतात. याचे नरम व पांढरे लाकूड कागदाचा लगदा, आगपेट्यांची खोकी, आगकाड्या इत्यादींस उपयुक्त असते. साल मूत्रल (मूत्रवर्धक), पौष्टिक व उत्तेजक असते. बिगटूथ्ड अॅस्पेनचे लाकूडही वरीलप्रमाणेच उपयुक्त आहे. यूरोपीय अॅस्पेनचे लाकूड सिगारच्या पेट्या, तोफेच्या दारूचा कोळसा, आगगाडीच्या डब्यातील तावदाने इत्यादींकरिता वापरतात.</p> <p style="text-align: center; "><img class="image-inline" src="https://static.vikaspedia.in/media_vikaspedia/mr/images/rural-energy/environment/91c94893593593f93593f92792493e-93592893894d92a924940/a.GIF" /></p> <p style="text-align: justify; ">लेखक : शं. आ. परांडेकर</p> <p style="text-align: justify; ">माहिती स्रोत : <a class="external-link" href="https://marathivishwakosh.maharashtra.gov.in/khandas/khand1/index.php/component/content/article?id=1261" target="_blank" title="अॅस्पेन">मराठी विश्वकोश</a></p>